KORONADAL CITY – Nagapadayon sa subong ang hot pursuit operation sang mga otoridad sa mga suspek nga nagluthang-patay sa outgoing barangay chairman sa banwa sang Surallah, South Cotabato.
Sa interbyu sang Bombo Radyo Koronadal kay PCI Jardi Mont Sibal, chief of police sang Surallah PNP, alas-8:30 kaina sang aga sang nagluntad ang pagpangluthang Brgy. Chairman Pudi Ambalgan, outgoing barangay captain sang Barangay Upper Sepaka, Surallah, South Cotabato.
Suno kay PCI Sibal, sa inisyal nga imbestigasyon bag-o lamang matapos ang parade sang ginpalapitan sang wala pa makilala nga suspek si Ambalgan samtang yara sa Bahay Kubo sa sulod mismo sang compound sang Municipal Hall kag ginluthang.
Nag-angkon sang duha ka igo sang bala sa dughan kag tiyan ang biktima.
Gindala pa ini sa pribado nga balaybululngan sa siyudad sang Koronadal apang ginbawian man sang kabuhi.
Ang nasambit nga barangay Kapitan ang nagtambong sa ginapatigayon nga aktibidad sa Farmers festival angot sa selebrasyon sang foundation anniversary sang nasambit nga banwa.
Nahibaluan nga si Ambalgan ang may kaso nga ginapangatubang angot sa illegal nga droga, illegal possesion of firearms kag may kaso man nga administratibo sa Sangguniang Bayan sang Surallah.
