KORONADAL CITY- Nagpalab-ot sang pagpasalamat ang pamilya sang Overseas Filipino Worker sa Saudi Arabia nga nadula sa maayo nga panghuna-huna makaligad suno pa nga mabiktima sang pagpang-abuso sang iya nga mga amo.
Sa interbyu sang Bombo Radyo Koronadal kay Gng. Jessie Garcia, iloy sang OFW nga si Melanie Garcia Baylosis 34 anyos sang Maltana, Tampakan South Cotabato, natuman ang pangamuyo sini nga makapauli nga buhi sa Pilipinas ang iya nga bata sa bulig sang Bombo Radyo kag kay Bombo Correspondent Boyet Forro.
Kun madumduman nagpalapit sa Bombo Radyo Koronadal ang iloy ni Melanie makaligad nga mabalitaan sini nga nadula sa tama nga panghuna-huna kag gindala sa Mental Hospital ang iya bata bangud suno pa sa pagpang maltratar sang iya mga amo.
Samtang sa pihak nga bahin, suno sa Philippine Overseas Labor Office, ginpahayag sang Saudi Police nga wala suno pa ginmaltratar si Melanie kag ginpabulaanan man sang mga amo sini nga ginasakit nila ang Pinay DH kag sa baylo nahomesick lang suno pa ini kag naka eskperyensya sang depresyon kag naghana nga maghikog rason nga ginturnover sa Mental Hospital.
Sa karun yara na sa pungsod si Melanie kag nagalaum ang pamilya sini nga makarekober pa sa tuman nga depresyon ang Pinay DH ilabi na nga may mga kabataan ini nga nagasalig sa iya.
