NORALA, SOUTH COTABATO – Preparado na ang pamilya Padernal-Villavende sa pagdul-ong bwas nga adlaw Enero 23,2020 sa ulihi nga palahuwayan kay Jeanelyn Villavende.
Sa eksklusibo nga interbyu sang Bombo Radyo Koronadal kay Nelly Padernal,tiya ni Jeanelyn nga may yara sang igapatigayon nga misa sa Immaculate Conception Church takna alas-10 sang aga antes ini nga igalubong sa Norala Public Cemetery.
Suno kay Padernal, may yara man sang igapatigayon nga necrological service ang pamilya para sa nagtaliwan nga OFW.
Subong nga gab-i bukas ini sa tanan nga mga nakakilala kag mga himata ni Jeanelyn nga luyag makita sa ulihi nga tion.
Ginalauman man nga personal nga magatambong si DOLE Sec.Silvestre Bello III bwas nga adlaw sa paglubong kay Jeanelyn.
Madumduman nga si Jeanelyn ang isa ka OFW nga halin sa pungsod Kuwait nga brutal nga ginpatay sang iya mga mapintas nga mga employer.
