KORONADAL CITY– Nagpangayo bulig ang isa ka Overseas Filipino Worker nga nakabase sa pungsod Saudi Arabia matapos makaeksperiensiya sang pagmaltrato sang iya mga amo.
Sa video nga ginpasa sini sa Bombo Radyo, nagpakilala ini nga si Pinky Cabradilla sang Busok, Bagumbayan Sultan Kudarat kun sa diin 10 pa lamang ka bulan nga nagatrabaho sa Arrar City, Dammam Saudi Arabia kag ang ahensya naman sini amo ang Munif aldamashi agency.
Suno kay Pinky, indi na sini masarangan ang iya sitwasyon sa kamot sang mga amo bangud 2 ka oras lamang ini nga ginapahuway kag halos wala na sang tulog.
Dugang pa sini nga siya ang ginapreso sa sulod sang balay kag nakaeksperiensa naman nga malipong sa tuman nga kakapoy, kakulangan sang tulog kag pagkaon.
Madugay naman suno pa itni nga ginapromisahan sang iya nga ahensya nga bawion sya sa kun maltratuhon sang amo apang tubtub subong yara gihapon ini sa poder sang mga amo.
