Nagapadayon ang Office of the Building Official (OBO) sang Koronadal sa ila assessment sa mga pampubliko kag pribado nga mga edipisyo matapos ang pila ka mga pagtay-og nga nabatyagan sa syudad sang nagligad nga mga adlaw.
Sa interview sang Bombo Radyo Koronadal kay Engr. Charlie Laput, Office of the Building Official (OBO) Head, ginpahayag niya nga may pila na ka mga building owners ang nagsumiter sang ila mga report agud makapatigayon sang inspeksyon ang ila mga establisemento.
Suno kay Engr. Laput, sa ila ginpatigayon nga assessment, may pila ka mga edipisyo nga ginrekomendaran sang immediate repair agud masiguro ang integridad sang istruktura kag kaluwasan sang mga naga-istar ukon nagagamit sini.
Ginpaathag niya nga padayon ang ila pagmonitor kag pag-inspeksyon sa mga bilding sa syudad bilang kabahin sang ila responsibilidad, ilabi na matapos ang mga natabo nga paglinog kag pagtay-og sa lugar.
Gin-awhag man sang OBO ang mga tag-iya sang building nga magpa-inspeksyon gilayon kun may makita sila nga mga litik ukon pagbag-o sa kondisyon sang ila mga edipisyo.
