Ginpaklaro sang National Union of People’s Lawyers (NUPL) nga indi miyembro sang ila organisasyon si Atty. Amando Virgil Ligutan, isa ka private prosecutor sa impeachment trial ni Vice President Sara Duterte.
Ini matapos iugnay ni anay National Task Force to End Local Communist Armed Conflict (NTF-ELCAC) spokesperson Lorraine Badoy si Atty. Ligutan sa NUPL kag sa grupong Lumaban, nga gin-designate sang Anti-Terrorism Council bilang terorista nga organisasyon.
Ginpanginwala ini ni NUPL Secretary General kag human rights lawyer Kristina Conti, nga nagsiling nga sala kag makahalit sa ngalan ang mga pahayag ni Badoy.
Suno kay Conti, kasagaran nga ginatarget sang red-tagging ang mga abogado nga nagauyat sang mga kaso may kaangtanan sa human rights kag nagarepresentar sa mga sektor nga yara sa laylayan sang sosyedad.
Ang NUPL isa ka nasyonal nga organisasyon sang mga abogado nga nagauyat sang mga kaso may kaangtanan sa katungod sang katawhan kag public interest.
Sa karon, wala pa nagpagwa sang pahayag si Atty. Ligutan parte sa mga akusasyon ni Badoy.
