KORONADAL CITY – Gin-ako sang mga rebeldeng New People’s Army (NPA) ang pagsalakay sa isa ka barangay sa Magpet, North Cotabato kun diin gindis-armahan sang mga ini ang mga katapu sang Barangay Peacekeeping Action Team (BPATs).
Kadungan sini, hugot naman nila nga ginpanginwala nga ginkidnap nila si Brgy. Mahongkog chairman Michael Lingaro.
Una diri, naguwa ang report nga ginkidnap sang mga miyembro sang NPA Front 53 ang nasambit nga kapitan kadungan sang pag-agaw sang mga ini sang armas sang mga BPAT’s.
Nahibaluan nga yara sa masobra 60 ka mga miyembro sang NPA nga may bitbit nga matag-as nga kalibre sang armas ang nagsalakay sa nasambit nga lugar kun diin nakuha nila ang nagkalain-lain nga mga armas luthang sang mga BPAT’s didto.
Sa sulat pahayag nga ginpaguwa sang Guerilla Front Committee 53 sang New People’s Army (NPA), ginpahayag sang tigpamaba sang mga ini nga suportado nila ang ginaduso na peace talks apang indi suno pa sila mag-untat sa pagpatigayon sang pag-atake.
Samtang, padayon man nga nakaalerto ang militar sa nasambit nga lugar agud nga mapunggan ang mga rebelde sa liwat nga paglunsar sang mga kalakasan.
