KORONADAL CITY- Natalana na nga pasakaan sang National Bureau of Investigation ukon NBI sang patong-patong nga kaso si Joel Apolinario kag mga opisyal sang Kabus Padatuon Community Ministry International Inc. ukon KAPA.
Sa ginpatigayon nga press conference sang NBI sa atubang sang media, ginpahayag ni Antonio Pagatpat, Deputy Director for Regional Operations Service nga isa ka “criminal enterprise” kag indi isa ka religious sector ang KAPA.
Gin-insister ni Pagatpat nga nagaluyo lamang ang KAPA bilang isa ka religious organization kag maathag nga naglapas ini sa lay ilabi na sa Securities Regulation Code.
Ginpahayag man sini nga ang ginhimo nga direktiba ni Pres Rodrigo Duterte nga ipasirado ang KAPA ang para man sa ikaayo kag proteksyon sang mga Pilipino.
Kun indi suno pa ini mag-untat sa iligal nila nga operasyon, posible nga maglala pa ang sitwasyon sang pungsod.
Samtang, ginbuyagyag man sang NBI nga natalana na kuntani sila nga magpatigayon sang operasyon batuk sa mga opisina sang KAPA sa Hunyo 20, 2019 apang mas natemprano ini kasundo sang mandato sang pangulo.
Sa karon, desidido ang NBI nga sang-atan sang kaso nga large scale estafa kag syndicated estafa si Apolinario kag mga kaupdanan sini.
