KORONADAL CITY – Ginbawian sang kabuhi ang isa ka ginapatihan nga motornapper sa ginpatigayon nga hot pursuit operation sang gintingob nga pwersa sang Lambayong Municipal Police Station, Tacurong City PNP, SKPIU kag SKPHPT sa nagluntad nga carnapping incident alas 8:45, Biyernes sang gab-i sa Tacurong City.
Suno sa kapulinsa, nakabaton sila sang impormasyon sa direksiyon nga ginpalagyuhan sang suspek sa Lambayon gani gin-alerto ang mga checkpoint.
Tubtob nga naabtan ang suspek nagalagas nga mga pulis sa bahin sang Purok Rang-ay, Poblacion, Lambayong, Sultan Kudarat.
Apang sa baylo nga magpundo kag mangsunga, nagpalupok ini sa sa kapulisan bitbit ang iya nga armas gani napilitan ang mga puli nga magbalos tubtob nga naigo ini.
Gilayon nga nakig-koordinar ang mga pulis sa Sultan Kudarat Provincial Forensic Unit agud magpatigayon sang crime scene investigation.
Narekober sa crime scene sang Provincial Forensic Unit ang isa ka unit sang cal 45 pistol nga may serial number 113848 loaded sang magazine nga may duha ka bala kag isa nga nakaload.
Magluwas sini, nakuha man sang mga imbestigador ang isa ka basiyo sang .cal 45 kag tatlo ka basyo sang .cal 5.56 kag isa ka nagaduag blue nga Bajaj nga motorsiklo nga wala sang plate number nga gin-agaw man sini sa isa ka persona.
Samantala, nakumpiska man sa position sang suspek ang duha ka medium kag small size sachet sang ginapatihan nga shabu.
Sa karon, ginakilala pa ang suspek kag ginahibalo kun sin-o ang mga kaupdanan sini.
