KORONADAL CITY – Nagapadayon ang imbestigasyon sang kapulisan sa pagpangluthang-patay sa isa ka lead man sang construction company sa Brgy.Concepcion, siyudad sang Koronadal.
Sa ekslusibo nga interbyu sang Bombo Radyo Koronadal kay Manong Bobby, upod sang biktima nga si Andy Talib, pamilyado kag residente sang Barangay Koronadal Proper sa banwa sang Polomolok South Cotabato, wala sila makahibalo sa kun ano ang motibo sa pagpatay sa biktima.
Suno kay Manong Bobby, duha ka semana pa lamang nga nagatrabaho ang biktima sa nasambit nga konstruksyon nga ginapatukuran sang COVID-19 facility kag District Hospitall.
Samtang nagapahuway suno pa ang biktima sang hinali na lamang nga ginpalapitan sang mga wala pa makilal-an nga suspek kag ginluthang.
Nakibot naman ang misis sang biktima nga yara lamang sa atubangan sini sang magluntad ang krimen.
Nahibalyan nga isa ka babaye kag lalaki nga nakabonet ang mga responsable sa kamatayon sang biktima.
Sa subong, nagatipon pa sang dugang nga ebedensiya ang kapulisan agud matumod ang mga suspek.
