KORONADAL CITY – Padayon ang pagtumod sang Lutayan PNP sa motibo kag mga suspek kaangot sa pagluthang-patay sa isa ka imam sa Barangay Blingkong, Lutayan, Sultan Kudarat.
Ginkilala sang hepe sang Lutayan PNP nga si PSInsp Herman Luna ang biktima nga si Kipo Miskinan, 60 anyos kag residente sang Brgy Miskinan.
Base sa inisyal nga imbestigasyon, nangyari ang insidente sadtong Sabado kun sa diin nagikan sa Tamnag gym ang biktima kaupod ang iya bata kag asawa agud magkuha sang iya pension bilang senior citizen kag ginluthang ini sang riding in tandem sa ila pagpauli.
Naigo sa ulo ang biktima nga nangin rason sang iya hinanali nga kamatayon, samtang nakaangkon sang gasgas kag pilas ang iya asawa kag bata bangud sa pagkatumba sang motor sang magluntad ang pagpangluthang.
Nagapanawagan naman ang opisyal nga makig-angot sa ila ang sin-oman nga nakasaksi sa krimen agud mapadasig ang imbestigasyon kag pagtumod sa mga suspek.
