KORONADAL CITY – Wala na sang kabuhi ang isa ka minero sang maabtan sang rescue team makaligad nga madulaan sang oxygen sa sulod sang isa ka minahan sa Sitio Tunnel,Barangay Kematu, Tboli, South Cotabato.
Ginkilala ang napatay nga si Jomar Mariano Kuyan, 31, may asawa kag residente sang Sitio Lamla, Barangay Kematu sa nasambit nga banwa.
Maswerte naman nga nakaluwas ang 3 pa ka mga kaupdanan sini nga ginkilala kanday Martin Kuyan,48; Jim Tnem, 33 kag Josie Kuyan, 26 nga lunsay mga residente sang nasambit nga lugar.
Naguwa sa imbestigasyon sang mga otoridad nga nagsulod sa tunnel ang apat ka minero apang nakaeksperiensiya sang kabudlay sa pagginhawa bangud sa mga nagasulod nga gas sa minahan.
Gilayon nga naguwa sa minahan ang 3 apang nabilin sa sulod si Kuyan nga gintunaan sang gilayon sini nga kamatayon.
Sa pagresponder sang Municipal Disaster Risk Reduction and Management Council kaupod ang Tboli PNP, naabtan na lamang si Kuyan nga patay na samtang nahatagan naman sang first aid ang 3 ka mga biktima nga nakaluwas.
Sa subong, nagapaayo na sa hospital ang 3 ka mga minero.
Samtang, ginaistudyuhan naman sang Tboli LGU kun temporaryo nga ipasira ang nasambit nga minahan.
