KORONADAL CITY- Dako suno pa ang posibilidad nga plano sang mga terorista nga grupo nga isahon ang ila nga pwersa agud magpalapnag sang terorismo sa isla sang Mindanao.
Sa interbyu sang Bombo Radyo Koronadal kay South Cotabato Police Provincial Director Senior Superintendent Franklin Alvero, apisar indi pa nila direkta nga makumpirmar nga nag-isa na ang mga grupo sang Bangsamoro Islamic Freedom Fighters (BIFF), Maute Teroro Group, Abu Sayyaf Group (ASG), Local ISIS kag mga local recruit sang Jemaah Islamiyah, nakabaton na sila sang impormasyon nga may ginpatigayon ang mga ini nga pagsinapol sa Lanao luwas pa sa mga impormasyon nag naghalin sa National Intelligence Coordinating Agency (NICA-South Cotabato) nga nagtililipon ang mga opisyal sang mga terorista nga grupo sa Brgy. Kitango Datu Piang, Maguindanao.
Bangud sini, mas gindoble pa ang pagpatuman sang seguridad sa probinsya sang South Cotabato bangud sa plano nga pagpamomba sa pila ka bahin sang Mindanao kasubong sang Davao City, Kidapawan City, General Santos City kag syudad sang Koronadal.
Madumduman nga kahapon, asud-asod nga ginpasigabungan sang bomba ang syudad sang Tacurong nga ginkapilas sang 16 ka persona.
