KORONADAL CITY – Desidido nga magsang-at sang kaso ang isa sa mga biktima sang ginaaligar nga torture sa tion sang ginapatuman nga enhanced community quarantine sa bahin sang Brgy. San Jose sa siyudad sang Koronadal.
Sa ekslusibo nga interbyu sang Bombo Radyo Koronadal kay alyas Noel, SK chairman sang Brgy. Rotunda, nag-umpisa suno pa ang tanan sang ginkadtoan sila sang barangay kapitan nga si Danilo Simtim upod ang iya mga BPATs kag nagpaathag makaligad makabaton ang mga opisyal sang reklamo nga tuman suno pa sila kagahod sadtong gab-i sang Abril 15.
Makaligad sini gindala sila sa checkpoint kag ginasumbag sila sang isa sa mga BPATs samtang pakadto didto.
Gindala naman sila sa madulom nga bahin sang buluthoan kag didto sila ginpauba sang mga bayo, ginsumbag, ginabasa sang tubig, ginahanot kag ginatampa.
Dugang pa ni Noel, ginpakaon pa sila sang sili nga labuyo kag ginaguramos ang ila buhok.
Nagbalik naman sila sa checkpoint kag ginpasuksok ang mga basa nila nga mga bayo kag ginpainom pa sang kape nga wala sang lakot nga kalamay antes ginpauli.
Hugot naman nga ginkondenar sang Commission on Human Rights (CHR-12) ang nasambit nga insidente kag ginduso nga magapatigayon sila sang maid-id nga imbestigasyon.
