Naka-heightened alert ang mga otoridad sa Western Colombia, ilabi na sa mga lugar nga pinakamalapit sa sentro sang magnitude 7.4 nga linog, samtang nagapadayon ang monitoring para sa posible nga mga aftershocks kag dugang nga kahalitan. Sa interview sang Bombo Radyo Koronadal kay Jayrome Nuñez, Bombo International News Correspondent to Colombia, nga nagakadapat nga lantawon ang insidente indi lamang bilang isa ka emerhensya kundi isa ka wake-up call agud labi pa nga mapabaskog ang preparasyon sang pungsod sa kalamidad.
Wala pa isa ka tuig nga nagatinir sa Colombia si Nuñez, apang suno sa iya tiayon, madugay na nga wala naka-eksperyensya sang amo sini kabaskog nga linog ang lugar. Bangod sini, ang pagtay-og nangin isa ka daku nga kakibot bisan sa pila ka lokal nga mga pumuluyo. Ginapanawagan ni Nuñez ang pagpatigayon sang mas regular nga earthquake drills kag pag-adoptar sang mas agresibo nga mga tikang sa pagpreparar sa kalamidad, ilabi na sa mga buluthuan kag komunidad nga wala naanad sa mabaskog nga pagtay-og.
Samtang, ginareport nga diutay lang ang mga Pilipino nga nagapuyo sa Chocó Province, bangud ang komunidad sang mga Pilipino nasentro una sa Bogotá kag Medellín. Base sa komunikasyon ni Nuñez sa mga kakilala kag mga abyan, ginapahayag nga indi tanto ka grabe ang epekto sang linog sa Bogotá kon ipaanggid sa Medellín. Sa pihak sang ginreport nga kahalitan, nagalaum si Nuñez nga indi na maglala pa ang sitwasyon kag madasig nga magresponder ang mga otoridad, partikular na angot sa pinaka-apektado nga mga komunidad kag anuman nga posible aftershocks.
