Mga biktima sang linog sa North Cotabato nag-apela sang bulig makaligad maguba sang buhawi kag hailstorm ang ila tents

KORONADAL CITY- Makaluluoy kun ilaragwan sang isa sa mga nilibo ka mga apektado nga indibidwal sa Makilala, North Cotabato ang ila kahimtangan makaligad ang asud-asod nga kalamidad nga nag-igo sa ila banwa.

Madumduman nga wala pa man sila makabawi sa asud-asod nga linog, gindalasa naman sila sang buhawi kag hailstorm kun sa diin halos tanan nga naka install nga tents ang ginguba kag ginlupad sang tuman ka baskog nga hangin.

Gin-istorya ni Gng. Delma Hanye, 65 anyos, isa sa mga bakwit sa Brgy. Poblacion, Makilala nga ginkakibot na lamang nila nga pag-abot sang hapon, nag-ulan sang tuman ka baskog kag may buhawi nga nagpanalasa sa ila evacuation site nga ginlakipan pa sa pag ulan sang ice.

Natabunan suno pa sila sang trapal kag tanan sila nga maghimata ang basa man mangin ang ila mga gamit.

Dugang pa sini nga ang mga rasyon nga pagkaon kag tubig mangin ang mga bayo ang wala man nakaluwas sa mabaskog nga ulan kag buhawi.

Nagakatulala na lamang ini samtang ginalantaw nga guba naman ang ila temporaryo nga puluy-an.

Sa subong nagapanawagan sila sang bulig nga makaangkon sang maayo nga puluy-an makaligad ang asud-asod nga mga kalamidad.