KORONADAL CITY – Blangko pa tubtob sa subong ang mga otoridad kun sin-o ang mga suspek nga nag-ambush kay Libungan, Cotabato mayor Christopher “Amping” Cuan.
Apang natumod sa imbestigasyon sang Cotabato PNP kag SOCO-Kidapawan nga nagpwesto ang sniper sa isa ka edipisyo 50 metros ang kalayuon malapit sa national highway nga ginakahamtangan ni Cuan.
Suno kay PSupt. Bernard Tayong, spokesman sang Cotabato Provincial Police Office sa interbyu sang Bombo Radyo Koronadal, nagpalupok lamang sang isa ka bes ang sniper usar ang wala pa nahibal-an nga sahi sang armas kag gilayon nga nagsakay sa puti nga van kun sa diin nagpalagyo pakadto sa direksyon sang Midsayap.
Nakaluwas sa pagpangluthang ang alkalde apang naigo naman ang empleyado sang Libungan LGU nga si Alejandro Catulong nga 15 metros lamang ang distansiya kay Mayor Cuan.
Kaangot sini, ginpahayag ni Tayong nga magapatigayon ang alkalde sang isa ka press conference karon alas 9 sang aga.
Una nga gintumod sang mga otoridad nga posible nga pulitika ang motibo sa nasambit nga pagpang-ambush.
