KORONADAL CITY- – Nagpagua sang video ang ISIS linked Maute terrorist group kun sa diin kaundan sini si Father Teresito “Chito” Suganob nga taga-Norala South Cotabato nga nagapanawagan nga buligan sila nga makaluwas sa kamot sang terorista nga grupo.
Ginpahayag sang pari nga ginakabig sila mga “Prisoners of War” kaupod pa sini ang isa ka professor sang MSU Marawi nga hostage sang terorista nga grupo, yara man ang mga panday, house hold helpers mga bata kag ordinaryo nga tawo kun sa diin masobra 200 sila subong nga mga bihag.
Samtang nagapanawagan, mabatian ang mabaskog nga pagsigabong kun diin makita ang kahadlok sa nawong ni Father Suganob.
Sa panawagan ni Father Suganob, ginpahayag sini nga kun tani ikonsiderar sila sang presidente ilabi na ang ila kabuhi pinaagi sa paghatag sang demand sang terorista nga grupo nga i pull out ang tropa sang gobyerno sa siyudad sang Marawi kag sa palibot sang Lanao del Sur agud masalbar ang kabuhi sang masobra 200 nga kaupod sini.
Dugang pa sang pari nga nakahanda suno pa nga mapatay ang mga terorista sa pangalan sang ila relihiyon gani ginakabalak-an ang ila nga kabuhi nga sa subong yara sa ital-ital.
Magluwas sa video ni Father Suganob ginpaguwa man sang terorista nga grupo ang video sang iban pa nga mga bihag sini nga nagapangayo sang bulig kay Pres. Duterte.
Nahibaluan nga sa subong mabaskog ang military operation sang Armed Forces of the Philippine sa Islamic city of Marawi kun sa diin malapit na nga maubos ang pwersa sang Maute terrorist group nga kasamtangan nga 15% nalang samtang ang tikang nga ila ginhimo sa pagpagwa sang video ang isa ka desperado na nga pamaagi agud nga indi sila macorner sang militar.
