KORONADAL CITY- Nagsagol nga emosyon ang nabatyagan sang yara sa masobra 40 ka mga Overseas Filipino Worker’s makaligad ang mga ini nga makapauli sa Pilipinas halin sa pungsod Kuwait.
Ang nasambit nga mga OFW’s ang nakapauli sa pungsod pinaagi sa amnesty nga ginahatag sang gobyerno sang kuwait bilang pagpakita suno pa sang “goodwill” sang ila nga gobyerno kag sa pakig-angot sang gobyerno sang Pilipinas.
Suno kay Bombo Radyo Middle East correspondent Boyet Forro, kadamuan sang 40 ka mga napapuli nga OFWs ang mga undocumented, mga nagpalagyo sa abusado nga mga employers kag biktima sang rape kag mga wala nahatagan sang nagakaigo nga sweldo.
Samtang ang batch sang nasambit nga OFW’s halin sa Kuwait ang kabahin pa lang sang 300 nga papulion sa idalum sang Duterte administration.
Nahibaluan nga ang nasambit nga tikang ang kasunod man sang mando sang presidente nga temporaryo nga isuspend ang bag-o nga deployment sang OFW’s sa Kuwait bangud sa serye sang misteryoso nga kamatayon kag pagpang-abuso sang mga OFWs sa nasambit nga pungsod.
