KORONADAL CITY- Naglab-ot sa masobra 100 ka sibilyan ang nagbakwit makaligad ang natabo nga engkwentro sa banwa sang Datu Odin Sinsuat, Maguindanao.
Suno sa report, naka-angkon sang bayluhanay sang lupok sa tunga sang mga miyembro sang Moro National Liberation Front ukon MNLF kag ang grupo ni Moro Islamic Liberation Front ukon MILF 104th Base Command 1st Platoon leader Pretty Belon sa Sitio Sultan, Barangay Bagoinged, DOS.
Nag-ugat suno ang gamo sang ginpalukpan sang MNLF members ang grupo ni Belon samtang ginasundan lang sang mga ini ang nadula nga hinuptan nga baka sa nasambit nga lugar kag gilayon nga nagbalos ang MILF members.
Ginpahayag man sang MILF nga ginsunog suno pa sang MNLF ang pila ka balay butang nga hugot naman nga ginpanginwal ni MNLF Vice Chair Romeo Sema.
Kaangot sini, suno kay Sema may tikang na suno pa nga ginhimo ang pamunuan sang 2 ka moro fronts agud nga mag-ayuhan.
Sa karon, padayon ang pagbantay sang kahimtangan sa lugar agud nga masiguro ang kaluwasan sang mga sibilyan.
