Ginaduso sang Department of Agriculture (DA) ang mga tikang sa paproteher sa mga lokal nga mangunguma kag manugpangisda batok sa epekto sang Middle East conflict, lakip ang pagsaka sang presyo sang krudo.
Suno kay Assistant Secretary Arnel De Mesa, ginapadali sang DA ang pag-release sang fuel subsidies, kag sobra na sa 100,000 ka benepisyaryo ang nakabaton sini.
Dugang pa, nagahatag man sila sang bulig kasubong sang pagpadala sang Kadiwa trucks sa Benguet agud mabakal ang produkto sang mga mangunguma, kag pag-organisar sang trade fairs.
Ginapadasig man ang local government units nga magsuporta sa “Sagip Saka” program, nga nagatugot sang direkta nga pagbakal halin sa mga lehitimo nga farmers’ groups.
Bangud sa nagaabot nga El Niño, nagakoordinar ang DA sa iban nga ahensya agud magprepar, lakip ang pag-adjust sang planting calendar kag pagbalhin sa mga tanum nga indi tuman nagakinahanglan tubig.
Ginpatun-an man sang DA ang solar-powered irrigation system nga ginapaabot nga mangin fully operational antes matapos ang tuig, bilang dugang nga suporta sa food security.
