KORONADAL CITY- Naglab-ot sa karon sa masobra isa ka libo ka hektarya sang umahan sa probinsya sang South Cotabato tuga sang tuman ka init nga paniempo dala sang El nino phenomenon.
Ini ang ginkumpirmar ni Engr. Orlando Tibang, Division Manager A sang NIA-South Cotabato sa eksklusibo nga interbyu sang Bombo Radyo Koronadal.
Suno kay Tibang, yara sa 30% ang gin-nubo sang water supply sa South Cotabato kun sa diin tuman nga apektado ang mga mamumugon sa probinsya.
Indi na suno pa masarangan nga mahatagan sang nagakaigo nga patubig ang mga umahan sa probinsya bangud sa tuman na ka nipis ang tubig halin sa Dam kag halos ubos na nila nga i-release sang nakaligad nga bulan.
Dismayado man ang NIA bangud sa madamo nga mga mangunguma ang wala nagsunod sa cropping calendar kag sa karon ang tuman nga apektado sang dry spell.
Kaangot sini, ginrekomendar sang NIA nga sundon ang mga alternatibo nga pananom agud indi tuman nga malugi kag magkadto sa wala ang ila nga ginpangabuhian.
Aminado man ang NIA nga wala nila ginlauman nga mangin malala ang epekto sang El Niño subong nga tuig nga ginakabalak-an pa nga magdugay tubtob Hunyo.
