Mariing itinanggi ng Malacañang Press Corps (MPC) ang mga paratang na sila’y ginagamit o binabayaran upang pagtakpan ang tunay na kalagayan ng kalusugan ng Pangulo—isang usaping itinuturing nilang mahalaga sa pambansang seguridad.
Sa kanilang opisyal na pahayag, iginiit ng MPC na malinaw sa kanilang mga nakaraang ulat at press briefings ang kanilang pagiging mapanuri, lalo na sa pagtatanong sa mga opisyal ng pamahalaan tungkol sa kalusugan ng Pangulo. Pinanindigan din nila ang integridad at kredibilidad ng kanilang coverage nitong mga nakalipas na linggo.
Kinondena ng grupo ang umano’y mga pagtatangkang sirain ang reputasyon ng mga mamamahayag at iligaw ang publiko para sa pansariling interes. Ayon sa MPC, ang kanilang mga ulat ay dumaraan sa masusing beripikasyon at nakabatay sa mapagkakatiwalaang sources at aktwal na obserbasyon.
Kasabay nito, binatikos din nila ang ilang content creators na nagpapakalat umano ng hindi beripikadong impormasyon, na nakabatay lamang sa social media, haka-haka, o kuwestyonableng motibo.
Sa huli, nanawagan ang MPC sa publiko na maging mapanuri sa mga impormasyong nakikita online, lalo na sa gitna ng pagdami ng maling balita. Sa kabila ng mga akusasyon, tiniyak nilang ipagpapatuloy nila ang kanilang tungkulin—ang magtanong, magsiyasat, at maghatid ng patas na balita—habang naninindigan sa katotohanan at kapakanan ng mamamayan, anuman ang administrasyong nakaupo sa Malacañang.
