Yara na sa maayo nga kahimtangan ang mga performers sang Lake Sebu nga naapektuhan sang matindi nga init sang adlaw sa nagligad nga Street Dancing Competition Showdown, suno kay Lake Sebu Mayor Antonio “Kent” Fungan Jr.
Sa interview sang Bombo Radyo Koronadal, ginpahayag sang alkalde nga bilang sunod nga tikang, ginapangabay niya sa Provincial Government sang South Cotabato nga butangan sang atop ang performance area sa masunod nga T’nalak Festival agud malikawan ang kasubong nga insidente.
Madumduman nga sang Hulyo 18, 2026, bilang kabahin sang pagsaulog sang 27th T’nalak Festival kag 60th Founding Anniversary sang Probinsya sang South Cotabato, pila ka performers sang Lake Sebu ang gin-stretcher matapos mapilasan ang ila mga tiil kag makabatyag sang kapoy bangud sang tuman nga kainit sang panahon kag sang mainit nga platform nga ila ginsaotan.
Ginpahayag sang alkalde nga makabulig ang pagbutang sang atop sa performance area agud maprotektahan ang mga performers kag mapabilin nga luwas ang ila pagpasundayag sang kultura kag tradisyon sa masunod nga mga T’nalak Festival.
