Ginpanindugan ni Senador Panfilo “Ping” Lacson nga dapat mas padal-man sang Commission on Audit (COA) ang pag-audit sa paggamit sang confidential funds, lakip ang pag-inspeksyon sa secured vaults kag pagberipika sang matuod nga identidad sang mga nagagamit sang alyas.
Suno kay Lacson, dapat mahibaluan sang COA kun sin-o ang yara sa likod sang mga alyas nga makita sa acknowledgment receipts, kasubong nanday “Mary Grace Piattos,” “Patty Ting” kag “Andy Lim.”
Ginkuwestyon man niya kun paano na-verify sang COA ang mga transaksyon sang confidential funds kun wala sini aktuwal nga gin-inspeksyon ang vault kag nagdepende lang sa paper audit.
Ginmentionar man ni Lacson ang COA Circular No. 2020-005 nga nagahatag sang proseso para sa fraud audit investigation.
Suno sa iya, dapat man ini ginpatigayon sang COA bangud sa mga impormasyon nga naggwa sa pag-audit sang confidential funds.
Ginpanawagan man ni Lacson sa impeachment trial ang pag-amendar sang joint memorandum sang COA bangud kulang ini, suno sa iya, sa pagdetalye kun diin gin-gamit ang confidential funds.
