KORONADAL CITY – Nagnubo suno pa ang numero sang krimen kag kalakasan nga nagakatabo sa probinsiya sang Sultan Kudarat humalin sang ginpatuman ang curfew hour angot sa deklarasyon sang Martial Law ni Pangulong Rodrigo Duterte.
Ini ang ginpahayag ni Sultan Kudarat Governor Sultan Pax Mangudadatu.
Suno kay Mangudadatu, suportado niya ang nasambit nga deklarasyon ni Pangulong Rodrigo Duterte sa bug-os nga Mindanao bangud aminado siya nga para sa kalinong sang tanan ang tinutuyo sini.
Gintawag pa ni Mangudadatu nga indi matuod nga Islam ang mga Muslim nga wala nagasunod sa kamanduan ni Allah ukon ang mga Moro nga nagahimo sang kalakasan kasubong sang mga Maute terrorist group nga nagapatay sang mga inosente nga sibilyan sa Marawi.
Kaangot sini, natalana nga maghatag sang bulig ang Sultan Kudarat provincial government sa mga apektado nga residente sang Marawi.
Hingyo naman sang opisyal sa militar kag kapulisan ang patas kag makatawo nga pagtratar sa mga sibilyan.
Kag nagpalab-ot man ini sang kasubo kag simpatiya sa pamilya sang mga napatay nga suldado gikan sa North Cotabato bangud sa Marawi encounter.
