Nagpanawagan si Sen. Risa Hontiveros sa kasubong nga senador nga si Sen. Ronald “Bato” Dela Rosa nga magrespeto sa layi kag magkooperar sa mga otoridad kasunod sang mga report nga “enforceable” na ang arrest warrant halin sa International Criminal Court (ICC).
Ini may kaangtanan sa ginpahayag sang Department of Justice (DOJ) nga posible na ipatuman sa pungsod ang nasambit nga warrant.
Kaangot man sini, ginbasura sang Supreme Court of the Philippines ang hingyo sang kampo ni Dela Rosa nga Temporary Restraining Order (TRO).
Suno kay Hontiveros, dapat matuman ang “rule of law” kag kinahanglan nga irespeto ang legal nga proseso.
Ginawhag man niya ang senador nga magsungka kag magkooperar sa mga otoridad, kag nagpahayag sang paglaum para sa “mapinadayunon kag matarong nga resolusyon” sang sitwasyon nga may dako nga epekto sa mga institusyon kag sa bug-os nga pungsod.
