KORONADAL CITY – Nagapadayon ang imbestigasyon sang mga otoridad sa posible nga motibo sa pagpatay sa isa ka negosyante kagab-i sa bahin sang Arellano Street, Brgy. Zone III, Koronadal City.
Ginkilala ang biktima nga si Ruby Garcia, 51 anyos, negosyante kag residente sang Camella Homes, Brgy. Carpenterhill sa syudad.
Sa eksklusibo nga interbyu sang Bombo Radyo Koronadal kay Venerando Randy Garcia ang ti-ayon sang biktima, papuli na kun tani ang iya nga asawa sang gilayon na lamang ini ginpalapitan sang suspek kag ginluthang saiya nga ulo sang duha ka bes.
Gilayon naman suno pa nagpalagyo ang suspek makaligad ang natabo nga insidente sakay sang isa ka salakyan.
Suno naman sa nakakita, pagabuligan na suno pa nila ang biktima apang mismo sila man gintayaan man sang baril.
Dugang pa ni Venerando, wala ini mapaminsar nga kabangdanan sa kun ngaa ginluthang-patay ang iya nga ti-ayon kay apisar pagpamahog sang kabuhi ang wala suno pa nabaton ang ila nga pamilya.
Sa subong, gakasubo kag hustisya ang ila ginasinggitan sang ila nga pamilya sa natabo nga krimen.
