Magapatuman sang mas estrikto nga montoring ang Koronadal City PNP batok sa mga Resto Bars kag aktibidad sang mga sini may kaangtanan sa Human Trafficking sa syudad. Ini ang ginpasiguro ni PLtCol. Harold Cornel- Koronadal City PNP sa interview sang Bombo Radyo Koronadal.
Suno sa iya, masami man nga naga libot ang mga kapulisan kada tion sang kagab-ehon sa mga resto bars sa syudad agud nga sigurohon nga wala sang naga dala sang mga kontrabando, armas kag iban pa nga mga illegal nga mga butang. Apang ginahatagan sini sang ligwa nga mas pasangkadon pa sini ang monitoring batok sa Human Trafficking agud nga mapanabat ang mga nagalapas sa kasuguan. Nag-paandam man ini nga mahimo mag atubang sang seryoso nga mga kaso kag mabug-at nga penalidad ang mga business owners nga may human trafficking activities sa ila nga mga negosyo.
Madumduman nga nangin madinalag-on nga na-rescue sang National Bureau of Investigation-Central Mindanao Regional Office (NBI-CEMRO) ang siyam ka ginaalegar nga biktima sang human trafficking, lakip ang ginaalegar nga isa ka menor de edad, sa ginpatigayon nga entrapment operation sa isa ka bar sa Barangay Zone I, Koronadal City.Naarestar man sa nasambit nga operasyon ang duha ka floor manager nga ginaalegar nga nagaserbi bilang mga bugaw kag may kaangtanan sa ginapatihan nga human trafficking activities sa amo nga establisyimento.
