KORONADAL CITY- Nagdeklarar subong sang suspensyon sang klase ang pila ka mga lugar sa rehiyon 12 kag Bangsamoro Autonomous Region in Muslim Mindanao o BARMM bangud sa epekto sang malain nga paniempo.
Sa interbyu sang Bombo Radyop Koronadal kay Lake Sebu, South Cotabato Mayor Floro Gandam, ginkinahanglan nila nga magsuspendir sang klase sa elementarya kag sekondarya sa pribado kag pampubliko nga mga buluthuan bangud sa wala untat nga pagbubo sang ulan halin pa sang nakaligad nga gab-i kag subong nga adlaw.
Pahayag sini nga apisar naghuyang na ang ulan kinahanglan anay nila magpatigayon sang assessment agud malikawan nga makaangkon sang danyos bangud landslide kag flashflood prone area ang banwa sang Lake Sebu.
Samtang sa pihak nga bahin , nagsuspinder naman sang klase halin pre-school tubtob sa elementarya ang Cotabato City, Pigcawayan, North Cotabato, Sultan Kudarat, Maguindanao kag Datu Odin Sinsuat, Maguindanao bangud sa malain nga paniempo.
