KORONADAL CITY – Nagpahayag sang kahandaan ang kapin 12,000 mga manunudlo sa rehiyon-12 nga magtudlo online sa tunga sang krisis nga tuga sang covid-19.
Sa eksklusibo nga interbyu sang Bombo Radyo Koronadal kay Deped-12 regional director Dr. Allan Farnazo, ginkalipay sini nga naglab-ot sa 11,700 nga mga manunudlo ang nagsabat sa nasambit nga hangkat halin sa masobra 43,000 nga mga manunudlo sa bug-os nga rehiyon.
Magluwas diri, ila man nga igapatuman ang duha nga sahi sang pagtudlo para sa mga estudyante nga eksklusibo nga ginproponer sang mga opisyal nga ginalakipan sang online kag modular teaching.
Suno kay Farnazo, kun indi makausar sang online teaching ang isa ka estudyante labi na kun pigado ini kag wala sang computer, mahimo suno pa nga magpadulong ini sa buluthoan kag magkuha sang isa ka grading module kag i-download ang “DepEd Commons” ukon i-download ang 1 grading sa laptop, bilang kabahin sa modular teaching.
Dugang pa ni Farnazo, mahimo man ipatigayon ang home schooling ukon ang pagtudlo sang mga ginikanan sa ila mga kabataan sa ila mismo nga puloy-an bilang alternatibo nga paagi.
