Mas pinaigting ng International Criminal Court (ICC) ang paghahanda nito para sa nakatakdang paglilitis kay dating Pangulong Rodrigo Duterte matapos maglabas ng mga bagong alituntunin na layong gawing mas maayos, organisado, at episyente ang paghawak sa kaso.
Sa pinakahuling rekomendasyon ng ICC Registry, inatasan ang mga partidong sangkot sa kaso na maging mas malinaw at detalyado sa pagtukoy ng mga impormasyong nais nilang ilihim o ipa-redact mula sa mga pampublikong dokumento at transcript ng pagdinig.
Layunin ng hakbang na mapangalagaan ang sensitibong impormasyon habang pinananatili ang transparency sa proseso ng korte.
Iminungkahi rin ng Registry ang paggamit ng isang transcript verification system na nauna nang ginamit sa ibang kaso sa ICC upang masiguro ang katumpakan ng mga opisyal na rekord na magiging bahagi ng paglilitis.
Kasabay nito, hinihikayat ang mga kalahok sa kaso na gamitin ang mga digital case-management tools ng korte, kabilang ang witness-entity at evidentiary-materials modules, upang mapadali ang pag-organisa at pagsubaybay sa mga dokumento at ebidensiyang ihaharap sa paglilitis.
Ayon sa ICC Registry, mahalagang mailagay sa isang sentralisadong sistema ang lahat ng rekord upang maiwasan ang kalituhan at mapabilis ang pagproseso ng mga usaping procedural bago magsimula ang trial.
Samantala, nananatiling bahagi ng mga paghahanda ang pagsusuri sa kalagayang pangkalusugan ni Duterte. Nauna nang sinabi ni Presiding Judge Joanna Korner na magsasagawa pa ang korte ng panibagong medical assessment upang matiyak kung ang dating pangulo ay may kakayahang lumahok sa buong proseso ng paglilitis.
Bago ang itinakdang pagsisimula ng trial sa Nobyembre 30, magkakaroon muna ng karagdagang status conferences sa Hunyo 23 at Hulyo 14 upang plantsahin ang mahahalagang usaping legal at administratibo kaugnay ng kaso.
Ipinakikita ng mga hakbang na ito na puspusan na ang paghahanda ng ICC habang papalapit ang isa sa pinakamahalagang paglilitis na sinusubaybayan hindi lamang sa Pilipinas kundi maging sa pandaigdigang komunidad.
