Gintalana sang International Criminal Court (ICC) ang ikaduha nga status conference sa kaso ni anay Presidente Rodrigo Duterte may kaangtanan sa ginapaathag nga crimes against humanity bangud sang iya “war on drugs.”
Himuon ini sa Hunyo 23, 2026, halin alas-10:00 sang aga tubtob alas-12:00 sang udto (oras sa Pilipinas).
Pagatalakayon sa hearing ang lima ka isyu: ang deadline sang obserbasyon sa Expert Panel Report, protocol sa confidential information, limitasyon sang Prosecution Trial Brief, iskedyul sang masunod nga status conferences pagkatapos sang judicial recess, kag mga pampubliko nga pahayag sang mga counsel.
Ang una nga status conference ginhiwat sang Mayo 27, 2026, kag napaslawan nga kinahanglan pa ang isa ka dugang nga sesyon para sa mas detalyado nga pagtalakay sang kaso.
Sang Hunyo 12, nagpangayo ang korte sang mga suhestyon para sa agenda.
Ang prosekusyon lamang ang nagsumiter sang rekomendasyon sang Hunyo 17, samtang ang depensa kag Registry wala sang dugang nga mga isyu nga ginpasakop.
Natalana man nga himuon nga pampubliko ang conference, apang mahimo nga may pribado nga sesyon para maproteheran ang sensitibo nga impormasyon kag seguridad sang mga testigo.
Ginkumpirmar man sang ICC nga indi magtambong si Duterte sa pagdinig matapos niya nga i-waive ang iya katungod nga magtambong.
