Ginarekomenda sang House quad committee nga pasakaan sang kaso kriminal si anay Presidente Rodrigo Duterte kag ang anay mga aides sini nga sanday Senador Ronald “Bato” dela Rosa kag Christopher “Bong” Go.
May kaangtanan ini sa ila pagka-imbuelto sa extrajudicial killings sa nagligad nga administrasyon.
Sa progress report sang Quad Committee nga ginbasa ni quad committee chairperson Surigao Del Norte Rep. Robert Ace Barbers, klaro ang ila paglapas kag kinahanglan sila nga pasakaan sang kaso sa idalom sang Section 6 ukon iban pa nga mga krimen kontra sa katawhan sang Republic Act 9851 ukon kilala bilang “Philippine Act on Crimes Against International Humanitarian Law, Genocide kag pila ka Crimes against Humanity.
Lakip man sa ginarekomenda nga pasakaan sang kaso sanday anay PNP chief Oscar Albayalde, Debold Sinas, anay mga pulis nga sanday Royina Garma, Edilberto Leonardo kag Palace aide Herminia “Muking” Espino.
Dugang pa ni Barbers nga sang Nobyembre 13 sang gintawag ang anay presidente, ginkumpirma niya ang pag-uswag sang reward system nga target ang mga drug personalities gamit ang nabilin nga campaign funds para magamit sa reward system.
Ginkumpirma man ni Duterte sang gintawag ini sa senado nga ginapadasig niya ang mga kapulisan nga piliton nga magbato ang mga suspeks nga nadakpan agud ma-justify ang nagluntad nga pagpatay.
Ginsumiter na sang House of Representatives ang mga findings kag mga rekomendasyon sang Quad Comm sa mga ahensiya para sa nagakaigo nga aksyon.
