KORONADAL CITY – Nagakahangawa na ang mga Singaporeans nga makaangkon sang mga face masks kaangot sa pamahog sang coronavirus.
Kasunod ini sa pagkumpirmar sang Singaporean authorities nga yara na sa apat ang kumpirmado nga kaso sa nasambit nga pungsod.
Ginpahayag ni Marjorie Estoque, 14 ka tuig na nga OFW sa Singapore apang tumandok sang Janiuay, Iloilo sa interbyu sang Bombo Radyo Koronadal, madali lamang masoldout ang mga face masks sa ila.
Gindugang man sini nga first come first served ang pagkuha sang mga maskara kun sa diin lunsay mga kahon na ang ginabakal sang mga pumuluyo.
Hugot man ang ginapatuman nga monitoring sa ila mga airport kun sa diin kalakip sa ila pagsulondan amo ang gilayon nga pagpabalik sa pungsod nga ginhalinan yadtong mga indibidwal nga mataas ang body temperature.
Samtang baliskad sa iban nga mga Asian nations, nagpadayon ang Chinese New year celebrations sa nasambit nga pungsod, apesar naka-maskara ang mga nagpartisipar sa kasaulogan.
