KORONADAL CITY – Ginpanginwala sang isa ka empleyado sang DENR-12 ang akusasyon nga siya ang nakuhaan sang video nga nagahaboy sang basura sa kilid sang dalan sa bahin sang Barangay Paraiso, siyudad sang Koronadal.
Ini ang ginpahayag ni Barangay Kagawad Dante Calanao sa interbyu sang Bombo Radyo Koronadal.
Ginkilala ini kay Nur Ali Launte nga empleyado sang Department of Environment and Natural Resources (DENR-12) kag residente sang Victory Homes, Koronadal City.
Suno kay Calanao,nagkadto sa ginpatawag nga summon sang Barangay si Launte kag gin-ako nga siya ang nagapanag-iya sang salakyan nga nakuhaan sang video ngunit apang indi suno pa siya ang nagamaneho kag naghaboy sang basura kundi ang himata sini nga nagikan sa siyudad sang Marawi nga nagabakasyon lamang sa ila.
Naghingyo suno pa siya sang pasaylo bangud aminado siya nga ang ginhaboy nga isa ka sako kag mga supot sang basura sa kilid sang dalan ang nagikan sa ila puluy-an bangud sa mga resibo sang isa ka mall kun diin nakabutang pa ang pangalan sini.
Kadungan sini, nagpromisa si Launte nga indi na masulit pa ang hitabo.
Dugang pa ni Calanao, nagsumiter sang affidavit ang empleyado sang DENR kag ginpabayad ini sang multa nga P300.00.
Apang sa bahin ni Koronadal City Environment Officer Agustus Bretaña, pursigido ini nga mapahamtangan sang penalidad kag kaso ang nasambit nga empleyado sang DENR-12.
Suno naman kay Bretaña, magapadala siya sang sulta sa Regional Director sang DENR-12 kaupod ang affidavit ni Launte kag ang nakuha nila nga ebedensiya agud nga mahatagan sang nagakaigo nga aksiyon ang natabo.
Ginkadismaya man ni Bretaña ang una nga reaksyon sang DENR-12 nga “tsismis” lamang ang nasambit nga balita angot sa wala pa pagbaton sang pormal nga sulat gikan sa City ENRO.
Una na man nga ginpahayag sang opisyal nga dapat mapahamtangan sang penalidad ang may sala labi na kag nalamita diri ang talatapan sang DENR bangud sa baylo nga magserbe nga halimbawa apang siya pa ang nagpanguna sa iresponsable nga paghaboy sang basura.
