Nagatubang ang kampo ni anay Presidente Rodrigo Duterte sa International Criminal Court (ICC) agud supakon ang kahilingan sang prosekusyon nga usisaon ang mga gamit nga nakumpiskar sa iya pagdakop.
Ginlaragway ini sang depensa bilang isa ka “fishing expedition” ukon pagpangita sang ebidensya nga wala sang igo nga basehan.
Suno kay lead defense counsel Atty. Peter Haynes, madugay na nga yara sa kustodiya sang ICC Registry ang mga gamit, apang karon pa lamang ini ginapangayo nga usisaon sang prosekusyon bisan pa nakumpirma na ang mga kaso batok kay Duterte.
Suno sa iya, mahimo lamang ini makadugang sa pagkadelatar sang hearing.
Ginpamatukan man sang depensa ang hingyo nga usisaon ang tanan nga mga yabi nga nakuha sa pagdakop, nga ginpahayag nila nga wala sang klaro nga kaangtanan sa kaso kag mahimo pa makalapas sa privacy sang pamilya ni Duterte.
Bangud sini, ginpangayo sang kampo ni Duterte sa ICC Trial Chamber III nga magtakda sang Hunyo 30, 2026 bilang katapusan nga adlaw para sa bisan ano pa nga bag-o nga mosyon sang prosekusyon may kaangtanan sa mga ebidensya nga yara sa ICC Registry.
Luyag sang depensa nga malikawan ang dugang pa nga pagdelatar sa preparasyon para sa magaabot nga hearing batok sa anay presidente.
