KORONADAL CITY – Nakabaton sang death threat gikan sa ginapatihan dako nga personalidad nga involbado sa illegal nga droga si Mayor Ramon Abalos sang Lambayong, Sultan Kudarat antes natabo ang magkasunod nga pagpasigabong sang granada sa iya nga puluy-an kag police station kaina sang aga.
Ini ang ginkumpirmar ni Police Senior Supt. James Gulmatico, provincial director sang Sultan Kudarat sa interbyu sang Bombo Radyo Koronadal.
Suno kay Gulmatico, bag-o lamang nagikan sa puluy-an ni Mayor Abalos ang hepe sang Lambayong PNP kag mga kaupdanan sini sang matabo ang pagpasigabong.
Aminado ang opisyal nga ginatutukan ni Mayor Abalos ang kampanya batuk sa illegal nga droga sa ila nga banwa kag dako ang posibilidad nga may nabungguan ini nga dako nga sindikato.
Nagapati naman si Gulmatico nga isa ka grupo lamang ang may kahimuan sang pagpasigabong.
Madumduman nga pilason sa pagsigabong sanday Councilor Carlos Abalos, utod ni Mayor Abalos kag ang pakaisa sini nga si Richard Abalos.
Sa subong, naka-full alert status na ang kapulisan sa bug-os nga probinsiya sang Sultan Kudarat.
