KORONADAL CITY – Yara na sa kustodiya sang mga otoridad ang ginakabig nga drug queen sa siyudad sang Koronadal makaligad nga madakpan sa akto nga nagabaligya sang illegal nga droga sa Purok Roxas, Barangay Concepcion.
Ginkilala ni CADAC Action Officer Glorio Sandig ang nadakpan nga drug suspek nga si Melba Barit, 41 anyos, separar sa bana kag residente sang nasambit nga lugar kaupod ang boyfriend sini nga si Ibrahim Acoy Ganda, 28 anyos nga residente ng Barangay upper Sepaka, Surallah South Cotabato.
Nadakpan man ang bata ni Barit nga si Marloun Barit Masamlok, 24 anyos nga naabtan sa lugar sang mga pulis.
Nakuha sa mga suspect ang 1 medium pack (poseur item), 4 medium nga suspected shabu, 4 small sachet nga may residue sang suspected shabu, 8 pieces na aluminum foil, 1 bamboo sealant, disposable lighter kag 1 cellular phone.
Nahibaluan nga kilala sa nasambit nga lugar bilang “drug queen” si Barit nga una na nga natokhang sa ila nga barangay bangud yara man ini sa watchlist sang Koronadal City PNP kag CADAC.
Sa subong, natalana nga pasakaan sang kaso nga paglapas sa Republic Act 9165 ukon Comprehensive Dangerous Drug Act of 2002 ang mga nadakpan nga suspect.
