KORONADAL CITY — Dead on the spot ang driver kag helper sang isa ka fishcar matapos nga maipit sa sulod sang salakyan sang mahulog sa pil-as sa bahin sang national highway, Purok Maharlika, Barangay Saravia, Koronadal City.
Sa interbyu sang Bombo Radyo Koronadal kay Saravia Barangay Kapitan Gregorio Presga, puti nga forward nga fish car gikan sa General Santos City ang nagbaliskad nga salakyan sa nasambit nga lugar samtang mabaskog ang buhos sang ulan.
Ginkilala ang mga napatay nga sanday Paul Escorido Pastolero, 28, driver nga residente sang Barangay Canajay, Surallah, South Cotabato kag helper sini nga si Floyd Montelibano, 33, nga residente man sang nasambit nga lugar.
Nahibaluan nga nag-usar pa sang heavy equipment ang mga rescue workers apang nadugayan sang masobra isa ka oras antes nga nakuha ang duha.
Sa subong, nagapadayon ang imbestigasyon sang mga otoridad sa gintunaan sang aksidente.
