Imbestigaran sang Department of Justice (DOJ) ang mga ginbuy-an nga pahayag ni anay Presidente Rodrigo Duterte sa isa ka news conference sang Lunes sang gab-i nga nagapanawagan siya sa militar nga solbaron ang gintawag niya nga “fractured governance” sa idalom ni Presidente Ferdinand “Bongbong” Marcos, Jr., nga liwat niya nga gin-akusahan nga nagagamit sang ilegal nga droga.
Suno kay Justice Undersecretary Jesse Hermogenes Andres, ang mga pahayag ni Duterte ang posible makabig nga sahi sang sedisyon, kag dapat nga busision sa konteksto sang mga nangin pahayag man sang iya nga anak nga si Bise Presidente Sara Duterte.
Ginpahayag ni Andres nga ila tutukan ang tanan nga anggulo sang pamahog kun ini ang kabahin sang mas dako nga plano para sa destabilization.
Ginpasiguro naman ni Andres nga nakahanda ang gobverno sa ano man nga matabo kag loyal ang Armed Forces of the Philippines sa chain of command.
