Ginpahayag sang Department of Justice (DOJ) nga ginakonsidera nila ang posibilidad nga makipag-coordinate sa International Criminal Police Organization ukon Interpol agud mapauli sa Pilipinas si Atty. Harry Roque, anay presidential spokesperson ni former Pres. Rodrigo Duterte.
Sunod ini sa ginahimo nga plano sang DOJ nga makipag-angot man sa gobyerno sang The Netherlands, kun sa diin posible nagatenir si Roque sa subong.
Suno kay DOJ Assistant Secretary kag spokesperson nga si Asec. Mico Clavano, luyag nila ipahibalo sa gobyerno sang The Netherlands ang kaso nga ginapangatubang ni Atty. Roque kag ang iya kaangtanan sa ilegal nga operasyon sang Philippine Offshore Gaming Operator (POGO) hub nga Lucky South 99 sa Porac, Pampanga.
Ginkumpirmar ni Clavano nga may warrant of arrest na batok kay Roque kag sa iban pa nga ginatudlo nga kabahin sa kaso sang qualified human trafficking, upod kay Cassandra Li Ong kag siyam pa ka indibidwal.
Ginpahayag ni Clavano nga mahimo ipagi ang pagserbi sang warrant sa bulig sang Interpol.
Ginsiguro man niya nga wala sang “special treatment” nga ihatag sa kaso ni Roque.
Suno kay Clavano, tratuhon ini nga kaso pareho sang iban, kag kun may akusado nga ara sa guwa sang pungsod, gamiton tanan nga legal nga paagi agud mapauli siya diri sa Pilipinas.
Gin-athag sang DOJ nga ini nga mga tikang ila ginaubra bilang kabahin sang seryoso nga pag-usisa sang mga krimen.
