KORONADAL CITY- Gintawag ni South Cotabato Second District Representative kag Deputy Speaker for Mindanao Atty. Ferdinand Hernandez nga Anti-Filipino ang ginhimo sang singer nga si Leah Lopez Navarro sa nangin pahayag sini sa twitter nga “Retribution” ukon silot halin sa pagpanimalos ang natabo nga linog sa Mindanao.
Sa ekslusibo nga interbyu sang Bombo Radyo Koronadal kay Congressman Hernandez, dismayado siya sa nangin pahayag sang singer nga pagpakita sang pamatasan nga indi kinaiya sang isa ka matuod nga Pilipino.
Dugang pa ni Congressman Hernandez wala sang sin-o man ang nagakaangay maka eksperyensya sang malain nga panghitabo kag ang linog isa ka natural nga kalamidad.
Dugang pa sini nga naglain ang iya buot kag sang madamo nga Mindanaoans bangud sa baylo nga mag-isa kag magbinuligay nahimo pa ni Navarro nga mag komento sang malain sa natabo sa Mindanao.
Gin-insister sini nga sa tion sang kalamidad nagakadapat mag binuligay bisan ano pa ang politicial affiliation sang tagsa-tagsa.
Madumduman nga gindeklarar nga persona non grata si Leah Navarro makaligad ang iya kontrobersyoan nga pahayag sa twitter.
