KORONADAL CITY- Nagpa-athag ang Department of Agriculture Region 12 pinaagi kay Recovery Assistance Program for Rice Farmers ukon SUREAID focal person Amorsolo Gloria angot sa mga reklamo sang pila ka mga mangunguma sa probinsya nga wala maka avail sang loan program sang DA.
Sa interbyu sang Bombo Radyo Koronadal kay Amorsolo, ginhatagan punto sini nga may yara sang ginabasehan nga kwalipikasyon ang ahensya antes maka avail ang mga mangunguma kag ini ang ginalakipan sang mga mangunguma nga may isa ka ektarya panubo nga mga palayan kag nagakadapat nga miyembro man sang RSBSA ukon Registry System for Basic Sectors in Agriculture.
Ini bangud sa RSBSA nakalista ang mga mangunguma sa bug-os nga rehiyon 12 nga sarang makabenepisyo sang loan program sang ahensya nga ginatanyag sa mga apektado sang Rice Tarrification Law.
Sa rehiyon 12 may yara sang 20,103 ka mga mangunguma ang sarang maka avail nga gin identify sang ila tagsa-tagsa ka mga LGU’s.
Maga implementar naman sa nasambit nga mga programa amuh ang Department of Agriculture, Land Bank of the Philippines, Agricultural Credit Policy Council kag LGU.
Samtang sa pihak nga bahin gin-isa isa man sang DA 12 SUREAID focal person ang mga proseso agud nga maka avail ang mga local rice farmers sang loan program nga nagabalor sang P15,000 para sa mga apektado sang Rice Tarrification Law.
Sa interbyu sang Bombo Radyo Koronadal , nagakadapat nga magpadulong ang mangunguma sa Land Bank of the Philippines agud magkuha sang application form, paga fill-upan ini kag igasumiter sang mangunguma sa City ukon Municipal Agroculturist kag kun ma consolidate na sang City ukon Municipal Agriculturist ang application sa loan program, igapasa naman ini sa Provincial Agriculturist kag kun ma consolidate naman sang Provincial Agriculturist ang mga application forms igapasa niya ini sa Regional Office sang Dept. of Agriculture kag ini ang maga certify sa mga aplikasyon kag maga endorsar sa Land Bank sang mga loan sang mga mangunguma.
Pahanumdum sang DA nga nagakadapat sulod sa duha ka qualifications ang luyag mangin benepisyaryo sang loan program nga amuh ang mga mangunguma nga may isa ka ektarya panubo nga palayan kag nakasulod sa Registry System for Basic Sectors in Agriculture.
