Ginpahayag ni Commission on Elections (COMELEC) Chairman George Erwin Garcia nga yara na sa 95% ang kahandaan sang ahensya sa mga preparasyon para sa eleksyon. Suno sa iya, bisan isa na lang ka semana antes ang halalan, may mga ginatapos kag ginaplastar pa gihapon sila nga mga kinahanglanon.
Dugang pa ni Chairman Garcia, sa padayon nga Final Testing and Sealing (FTS) subong nga semana, wala pa sila sang naitalang teknikal nga problema nga ginaatubang sang mga miyembro sang electoral board. Wala man sang Automated Counting Machines (ACMs) nga nagdumili magbaton sang balota. Ang FTS maga-padayon tubtob Mayo 7.
Kaupod sini, ginapaabot man nga matapos na subong nga semana ang distribusyon sang mga balota sa nagkalain-lain nga lugar sa pungsod, bangud umpisa na man ini nga ipanagtag sa mga maestro kag maestra nga mangin electoral board sa adlaw sang eleksyon.
