Ginpahayag ni President Ferdinand Marcos Jr. nga nabalabagan sa border sang Germany ang anay Ako Bicol Party-list Representative nga si Zaldy Co matapos ini makasulod halin sa Czech Republic.
Sa pinakaulihi nga report, upod ni Co ang iya pamilya sang ma-intercept sang mga otoridad.
Bangud sini, ginbalik si Co sa mga otoridad sang Czech kag kasamtangan nga yara sa ila kustodiya.
Dugang pa sang Presidente nga padayon ang koordinasyon sang gobyerno sang Pilipinas upod sa Czech authorities kag Department of Foreign Affairs agud mapadasig ang proseso sang posible nga deportation ni Co pabalik sa pungsod.
Suno naman kay Interior Secretary nga si Jonvic Remulla, gin-arestar si Co sa Prague bangud sang pagbiyahe nga wala sang nagakaigo nga travel documents matapos kanselahon ang iya Philippine passport kag wala man siya nakapakita sang iya Portuguese passport.
Bisan pa sini, ginpahayag nga yara sa maayo nga kahimtangan ang anay kongresista kag padayon ang komunikasyon para sa iya posible nga pagpauli sa Pilipinas.
Madumduman nga nagaatubang si Co sang mga kaso nga graft kag malversation may kaangtanan sa gina-alegar nga substandard nga P289 milyon nga flood control project sa Naujan, Oriental Mindoro.
Nag-resign si Co sa Kongreso sang Setyembre 29, 2025 matapos irekomendar sang Independent Commission for Infrastructure ang pagpasang-at sang kaso batok sa iya kag sa iban pa nga mga opisyal.
Sang Marso sang sini nga tuig, ginpanindugan sang Sandiganbayan ang ila deklarasyon batok kay Co.
