Nagapadayon ang clearing operations sa lima ka mga Sitio nga napagkit ang landslide sa banwa snag Bagumbayan, Sultan Kudarat.
Ini ang ginkumpirma ni Municipal Disaster Risk Reduction and Management Officer III Richie Salazar sa interview sang Bombo Radyo Koronadal.
Suno kay Salazar, ang mga apektadong lugar ang ginalakipan sang Sitio Quarry, Sitio Maranatha, Sitio Slatan kag Sitio Malipayon sa Barangay Chua sa nasambit nga banwa.
Nagluntad ang pagkatiphag sang duta matapos ang asod-asod nga pagbuhos sang ulan kun diin may isa ka panimalay nga natabunan kag totally damage samtang may iban man nga mga panimalay nga partially damage lamang.
Bangud sa landslide, natabunan sang duta ang national highway rason nga nangin mabudlay para sa mga motorista gikan sa Barangay Poblacion padulong sa Barangay Masiag nga nagresulta sa pagka-stranded sang ginatos ka mga motorista.
Gilayon naman nga nagpatigayon sang clearing operation ang Municipal LGU sang Bagumbayan agud nga mabuksan liwat ang national highway gamit ang mga heavy equipment apang tubtob kagab-i nga indi makaagi ang mga four (4) wheeled vehicles.
Sa inisyal nga damage assessment ng MDRRMO yara sa 15 ektarya sang duta ang natiphag.
Sa subong nagapadayon ang clearing kag damage assesment sa lugar kun diin ginahibalo man kun mahimo pa nga makabalik sa ila tagsa ka panimalay ang mga residente nga nagbakwit.
