Ginhingyo sang Center for International Law ang gobyerno sang Pilipinas nga gilayon ipatuman ang arrest warrant nga ginpagwa sang International Criminal Court (ICC) batok kay Senador Ronald “Bato” dela Rosa.
Nagpanawagan man ang grupo nga kon maaresto ang senador, dapat gilayon siya isurender sa tribunal.
Ginpahayag ini ni CenterLaw Executive Director Atty. Gilbert Andres kasunod sang desisyon sang Supreme Court of the Philippines nga nagbasura sa apela sang senador para sa Temporary Restraining Order (TRO) kag Status Quo Ante Order.
Suno kay Atty. Andres, pinaagi sa desisyon sang Korte Suprema, wala na sang legal nga balabag sa Executive Department agud ipatuman ang warrant, sandig sa Republic Act No. 9851 ukon ang domestic law sang Pilipinas para sa International Humanitarian Law.
Ginpabug-atan pa sang abogado nga indi lang ini nagasunod sa layi sang Pilipinas kundi isa man ka international legal obligation sang pungsod.
Gintudlo man sang abogado ang mga probisyon sang Constitution of the Philippines nga naga-suporta sa kooperasyon sang Pilipinas sa mga international justice mechanisms kasubong sang sistema sang ICC.
