KORONADAL CITY- Gin-awhag sang Catholic Educational Association of the Philippines ang mga Pilipino nga mas suportaran pa ang ginaduso nga Bangsamoro Organic Law o BOL sa pihak sang asud-asod nga pagpamomba sa Mindanao.
Suno kay Fr. Joel Tabora ang presidente sang Educational Association of the Philippines sa Ateneo de Davao University, ginakondinar nila ang twin bombing sa Our Lady of Mt. Carmel Cathedral sa Jolo, Sulu mangin na ang pagpamomba sa sulod sang moske sa Zamboanga City nga nag utas sang madamo nga kabuhi sang mga sibilyan kag tropa sang gobyerno.
Dugang pa sini nga ang nasambit nga kinagamo ang may tinutuyo nga nagtanom sang akig indi lamang sa tunga sang Muslim kag Kristiyano apang mangin man sa Muslim kag kasubong nga Muslim kag Kristiyano kag kasubong nga Kristiyano.
Indi man suno pa dapat nga pabay-an ilabi na sang mga taga Mindanao nga patyon sang nasambit nga kinagamo ang handom sang Bangsamoro nga makaangkon sang pag umwad kag kalinong sa rehiyon kun sa diin nagakaigo na nga tion agud nga kilalahon, depensahan kag ipatuman ang BOL.
Gin-awhag man sini si Pres. Rodrigo Duterte nga mag appoint sang nagakadapat nga indibidwal nga may integridad para sa Bangsamoro Transition Authority nga magabulig agud nga mapatuman ini kag agud masalbar ang Mindanao sa tribalism kag factionalism.
