Isa ka bus nga puno sang mga Buddhist pilgrim ang nahulog sa banglid sa Sri Lanka sang Domingo, nga nagresulta sa kamatayon sang 21 ka tawo kag pagkapilas sang 24.
Ang mga liko-liko nga karsada sang nasambit nga pungsod kilala bilang isa sa mga pinaka-delikado sa kalibutan, kag ang disgrasya sa kilid sang pangpang sang Domingo ginakabig nga isa sa mga pinakamasami nga matabo sa Sri Lanka sa sulod sang pila ka dekada.
Ang nasambit nga bus ang ginapanag-iyahan sang gobyerno may sakay nga mga 70 ka pasahero— samtang nagaagi sa mabukid nga rehiyon sang Kotmale sang nadulaan sa kontrol ang drayber kag naligwat ini sa karsada antes magbanag-banag, suno sa kapulisan.
Ginpahayag ni Deputy Transport Minister Prasanna Gunasena nga gilayon nga gindala ang mga pilason sa duha ka ospital sa palibot.
Suno pa sa iya, posible nga mas damo pa ang napatay kon wala sang madasig nga bulig halin sa mga pumuluyo nga nagbulig magkuha sang mga biktima halin sa naguba nga bus kag nagdala sa ospital.
Ginkumpirma sang pulis nga 24 ka tawo ang ginabulong sa duha ka ospital.
Ang bus amo ang halin sa pilgrim town sang Kataragama kag padulong kuntani sa syudad sang Kurunegala.
Ang Sri Lanka amo ang may rekord sang average nga 3,000 ka road fatalities kada tuig, rason nga ginalakipan sang pinaka-delikado nga mga karsada sa kalibutan.
